ChatGPT une intelligence artificielle. 2nde partie

ChatGPT une intelligence artificielle.
2nde partie

Rédacteur : Serge RESTOG ·
Date de publication : 21 août 2023
Mise en page et images : Kréyospot
Dernière modification : mai 2025

Chat, G, P, T.

Adan mo ChatGPT i ni dé lidé. Prèmié-a, chat, sé an mo anglé ki té ké an model kozé ki ka fet ant moun, anlè Enternet.

Pou imajinen kalté konvèsasion-tala épi machin-la, sé lenvantè-a alé fè wouchach anlè Enternet pou sanblé bon enpé pawol ki ja ni, la, pawol ki ja matjé, la, é ki prévwè sèvi lontan alavans.

Dézienm lidé-a, sé G, P, T.

Let-tala, G, ka alé pou Generative.

P, pou Pre-trained.

T, pou Transformer.

Adan lang-nou, nou té ké kriyé sa : an sistenm ki sé an transfòmatè ki ja ni lantrenman é ki ké permet viré fè, sa yo ja aprann machin-la fè, avan.

ChatGPT sé kisa ?

ChatGPT sé an model langaj OpenAI mété doubout. OpenAI sé té an loutoupriz ki tounen an asosiyasion, dépi avan mwa maws 2019 é ki pa ka travay pou lajan.

I ka goumen pou an lidé ki sé, touvé an manniè pou fè rézonnman, pou réfléchi, men, épi an machin.

OpenAI kapab matjé teks lè moun ka mandé'y. Ou ni pou mandé'y sa ou lé adan chatbot-la, program-la ki ka permet ChatGPT fè lakonvèsasion. É, adan an batzié, machin-la ka ba'w répons anlè sa ou té mandé'y la.

Model lentèlijans-tala ni anba lopsion'y, an manniè aprann. Manniè aprann-tala ka ba'y lantrennman, lè i ka kouri alé-viré anlè Enternet.

Zouti-tala ka mété a dispozision, an manniè diskité ki ka permet rivé sòti pli méyè répons-lan, anlè tout kalté kèsion ki pozé.

Pou ChatGPT trapé lantrennman, i ka sèvi bon enpé teks i ka alé pran anlè Enternet. Sé konsa, i ka touvé sé teks-tala adan awtik jounal, liv-roman, pawol adan fim siléma, latélévizion. I ka fè osi, klasman, an travay ki pa fasil, ki ka pran anchay tan é ka ba moun ki ka fè sa, bon gaz.

Pou fè sa, an plis di, tousa nou ja di avan an, ChatGPT ka sèvi anpil pawol moun, lè yo ka palé anlè Enternet.

Chatbots  

Program-la ki ka permet ChatGPT fè lakonvèsasion an, ka sèvi sistenm ki ka travay anlè sé lang-lan, anlè sé model langaj-la, anlè sé kodaj-la, an manniè otomatik. Sé lang-lan, sé model langaj la, sé kod-la, sé sa yo kriyé Chatbots.

Chatbots ka ranplasé moun adan sé kalté ti travay-tala, ki pa ni valè, ki ka fè moun ped tan. Yo ka di vomié ba an robo fè sa. I pé fè sa fasilman épi yo pé ké ped lajan.

Adan sitiyasion-tala, i fok moun sa rivé fè bon dimand-lan. Fok sa mandé sa ou ka mandé'y la, an manniè klè, é tousa ou ka mandé a, ka pasé anba lanmen prompt.

Tout travay-tala ka pati anba lopsion dé zouti. Yonn yo ka kriyé prompt épi, lot-la sé ChatGPT.

Prompt

Prompt, ka fè lòdinatè-a fè katjil pou travay anlè langaj moun. Prompt ka dékatiyé sé langaj-la ek ka mété yo a manniè pou i konprann sé teks-la i ka sèvi a. Prompt ka di sistenm-lan ki mo pou'y sèvi pou ba sé lod-la, pou ba sé koumandman-an. Prompt pou fè tousa ka sèvi algorithmes. Sé algorithmes-la ka permet touvé solision pou an séri pwoblenm. Sé algorithmes-la pé rikonnet sé mo-a épi sé fraz-la ki ni potalans-yo. I pé rikonnet épi ki model gramè fraz-la fet é rivé touvé kisa sa vlé di.

Prompt ni tout fos-li é limenm, i sé an poto mitan ki ka permet tout sistenm-lan rivé fè sa moun ka mandé'y la.

Kisa yo ka mandé'y ?

Yo ka mandé'y konprann sé lod-la, konprann sé koumandman-an yo ka ba'y la a. Men, adan zafè sé koumandman-an, fok pa bliyé mété tala, ki sé an gwo mòso, é sé li ki met tout travay-la, sé contexte-la,

Sé contexte-la, ki ka mété douvan sé sitiyasion-an ki alantou sé diféran lalironday-la. Tousa ka ba ChatGPT zagré pou i konprann, adan ki ben an kozé yé. Épi limenm i pé kapab ba bon répons é répons ki ka tjenbé doubout.

An moman-tala, mannev-la sé sèvi kod pou mété doubout sitiyasion- an, toupannan i ka sèvi lalironday-la pou rivé ba an mo, tout sans-li, ki anpami milia dot mo.

Bon enpé sé dot mo a adan teks ki anlè Enternet, épi, yo adan pliziè lang, anglé, fransé, panyol, épi dot ankò, sitou lang anglé méritjen. Lang anglé méritjen an ka monté pabò 50 asou 100 sé mo-a. Épi, i ni lang fransé ki ka monté pabò 5 asou 100 sé mo-a.

Sé la, contexte-la nésésè pou rivé touvé an bon répons, épi ba répons anlè sa yo ka mandé'y la. Sa ki met, sé touvé an bon rézilta. Pli sa ou mandé'y la senp, pli répons-lan i ké ba'w la senp. Pli sé lang-lan, kolé anlè sé gran model sé langaj-la,anlè model sé kod-la, é pli, sa yo kriyé Chatbots ké senp osi.

Sa nésésè pou sé enjéniyè-a pòté ba sistenm-lan anpil, anpil

Es machin-la ni santiman é pé fè sa i lé, sa ki an gou'y ?

Machin-la pa ni kò pou'y pé di, i ni an santiman, pou'y pé di i ni sa ki fo pou santi an bagay. Sa pa ka rivé'y ni an lanvi pou endé moun fè an bagay, pou'y désidé fè an travay, li tousel. I pa ni bizwen ayen pèsonn. Sa pa ni ayen a wè épi manniè an moun yé. Ansel bagay machin-la konnet, sé fè travay-la yo ka mandé'y fè a. É, pou fè travay-tala, i ka sèvi tras-nou, tras moun, nou ki ja fè tout travay-tala alavans ba'y.

Adan tras-nou, i ka sèvi mo, mé osi foto, pòtré. Sé nou ki ka désidé sa nou pé fè épi tousa. Sé nou ki pou véyé sa machin-la andwa fè, é, ki manniè i ka fè'y.

Lentèlijans artifisiel la pa kapab fè menm bagay la ki lentèlijans an moun. Kontel, machin-la pa kapab fè moun wè a ki moman i ka adan an lémosion, adan an tjè kontan, adan an lapenn. I pa kapab montré ki manniè i ka ni an ti tjè feb pou an sitiyasion, konsi ou té ké di i té an moun.

Sé machin-tala ka anni fè fraz ki pa ka ni pies lentansion. Yo pa ka fè fraz yo menm désidé fè. Yo pa ka ni pies lémosion. Yo pé pa pran konsians di an sitiyasion, yo menm, silon pwop volonté-yo.

Yo pé pa di an pawol épi alafen pawol-la pété ri, pas pawol-la fè yo ri.

Sel manniè yo ké ri, sé, si moun-la ki rantré program-tala an machin-la, ba'y koumanman pou ri, lè i fini di pawol-tala, di'y fok ri, lè i fini di pawol- tala.

Moun ké andwa mété baraj adan sé machin-tala, pa pokosion. Sé baraj- tala ké la pou opozé dot moun fè mové jé, viéjé, jé mové lidé, jé mové lespri, jé mové pawol, kontel, jouré, di pawol malélivé, vié pawol, épi dot ankò.

Nou ka rivé konprann é nou asiré, sé pa sé machin-la ki ka mété sé mové mes-tala, yo menm, adan sé teks-la. Sé moun menm ki ka fè sa é ki ké toujou fè sa.