ChatGPT une intelligence artificielle. 3e partie

ChatGPT une intelligence artificielle.
3e partie

Rédacteur : Serge RESTOG ·
Date de publication : 21 août 2023
Mise en page et images : Kréyospot
Dernière modification : mai 2025

A ki moman, kitan nou ké sav si machin-la ka di lavérité ?

Adan an sosiété, moun ni bizwen ni rilasion épi dot moun. Yo ni bizwen bokanté pawol pou yo sa viv, pou yonn sa konprann lot. Sé épi an lentèlijans ki ka maché yonn épi lot sosiété-a ka mété koy doubout, ka maché, ka viv koy.

Sa ki maléré épi sé machin-tala, sé ki nou ka touvé kònou adan an sitiyation otila, tout moun pa ni asé lakonnésans pou rivé sav, kisa ki vré, kisa ki pa vré, adan tousa.

Nou ka konprann, la, i ni an gwo travay pou fè, sé, aprann moun, i ni dot moun ki pé fè machin la di tout kalté bagay. Sé la pou sèvi sé machin-tala fok rivé sav a ki moman rézilta-a i ka bay la sé lavérité oben, sa pa vré, sé mové lenfòmasion ki la.

ChatGPT pou fè kisa ?

Moun ki pé alé sèvi ChatGPT, pé ni pliziè diféran dimand kontel étidian, met-lékol, dévlopè lojisiel, ki ni bizwen an mòso adan kod progam lenfòmatik, oben sèvi pou'y endé matjé teks adan mésaj Enternet, épi dot ankò.

ChatGPT kapab touvé répons pou bon enpé kèsion. I kapab touvé lafen an fraz, mofwazé teks, matjé awtik é palé épi moun.

Moun ka sèvi ChatGPT pou matjé teks ki long, anlè an sijé ki espésial. I pé fè an rézimé an dokiman ki long. I pé popozé an plan épi tout détay pou an kouw. I pé matjé an email épi pwop istil matjé'w, i pé ba'w lidé pou endé'w touvé lenspirasion'w, i pé endé'w pou touvé solision adan an katjil difisil pou'w sa rivé konprann li. I pé matjé an istwa, ki pa réyel épi pliziè moun ki ka jwé adan'y.

Kisa ou pé mandé ChatGPT ?

Ou pé pres mandé'y tout bagay ou lé. I ni sa ki ka étidié ki ni plis toupé, ki ka mandé'y fè travay lékol-yo ba yo. Sitou, moun sav, ChatGPT réyisi pasé an lekzamen, adan an gran linivèsité.

Wix ka sèvi ChatGPT osi. I pé endé'w fè, an dé tan, twa mouvman, an

site Web enternet o konplè.

ChatGPT méchan toubannman adan zafè lamedsin la. I kapab dékatiyé an pwoblenm ek esplitjé'y.

Dot sektè pé sèvi lentèlijans artifisiel la, kontel sé loto-a. TESLA fè an loto maché tousel, san i ni pies moun ki ka kondui'y.

General Motors ka tray anlè sistenm pou fè ChatGPT endé moun adan

General Motors ka éséyé dépasé TESLA lè i ka fè an sistenm pou endé moun adan loto ki ké ankò pli entèlijan. Sistenm-lan menm paré pou ba'w konsey si ou trapé an pwoblenm motè, oben, né, épi loto'w, anlè larout.

Si né loto'w krévé anlè larout, sistenm-la ka montré'w an vidéyo pou montré'w ki manniè pou'w ranplasé né loto-a woumenm.

I pé di'w poutji an limiè ka limen anlè tablo-d`bow la. An menm tan, i pé alé pran an rédévou adan garaj si fok réparé'y.

Kisa ki ka rann moun entjet ?

Sa ki pé rann moun entjet. Dabò pou yonn, es machin-la pé rivé kouyonnen nou ? Asiré, i pé kouyonnen nou. Pas sé nou menmm ki mété andidan'y tout an séri pawol ki sé pawol nou menm. É sé pawol-tala pé fè jé kòsiè épi nou. Nou ka fè kònou konprann, tousa nou mété adan machin-la, machin-la pé sèvi'y, é tousa pé viré kont nou.

Pis tousa nou mété adan machin-la, i pé sèvi'y kon i lé. Es machin-la an moman-tala sé li ki ka ni lentasion fè an bagay,an bon bagay, an mové bagay, i pé santi koy fraksé ? Es, konm sé li ki pé santi koy, es i pé santi koy troublé, es i pé santi koy boulvèsé, kon noumenm, moun. Es i pé rivé ni lémosion kon nou menm ?

Es sa ké sifi pou machin-la rivé ni an lentèlijans ki ni lémosion

Jòdijou, nou ka wè sé machin-tala pòkò sa rivé kopiyé anlè lapansé moun é pou zafè lémosion-an, sa ankò plis konplitjé lè ou ni an kò, kon ta machin-la ki pa ka risanti ayen.

An final di kont, sa nou ka wè ki ka fet jòdijou épi lentèlijans artifisiel la, sé fè model anlè manniè moun ka pèsivwè, manniè moun ka rézonnen épi fè mo kon moun ka fè.

ChatGPT pé rann moun entjet, anlè lasékirité, pas i ni moun ki pé détounen'y pou fè sa ki pa bon, sa ki ta mové lespri. Sa pé tonbé an lanmen moun ki ni mové lidé oben moun ki malad. Sa pé tonbé an lanmen malfentè, moun mové mes. Machin-la, osi, ka fè lérè anlè kèsion ki potalan é sé moun ki ka sèvi'y ki ni pa ta-yo, pou korijé tousa ki pa bon.

Sa ki ja ka rann moun entjet sé, moun pé vòlè travay moun ki adan lakadémi, i pé ni osi ni laposibilité woté enpé plas travay, adan bon enpé sektè, bon enpé lantoupriz..

Anlo tjèsion ka pozé. Es ChatGPT pé minasé travay sé rédaktè-a ki ka travay adan sé jounal-la, laradio, latélé épi do ankò ?

Es ChatGPT ké pé kontinié alé vòlè tousa moun ka matjé é ki anlè Enternet, san mandé pies lotorizasion, san respekté teks moun ki ni poteksion épi "copyright" ?

Nou pé koumansé pa di, sèvi sé kalté zouti-tala ka mété dlo an bouch- nou. Men, prangad, pa annou mété lenfòmasion anlè sé lantoupriz-la, an lanmen nenpot ki moun. Sé la nou ka wè sa nésésè mété lwa pou potéjé sé teks-la.

ChatGPT chinwa - Ki manniè ChatGPT ka woulé an péyi Lachin ?

Lachin pòkò paré pou ba tout sé lantoupriz-la lotorizasion nasional, pou sèvi ChatGPT.

Lachin ka fè tousa i pé pou'y frennen anlè ChatGPT, pou'y pa trapé pwoblenm anlè zafè mové répons moun pé fè sé machin-la vwéyé déwò. Kontel, sali répitasion péyi-a, pousé moun pou ni divizion, pousé moun pou fè larévolision kont sistenm-lan, mété dézod ki ké opozé ni linité nasional, anpéché péyi-a ni lapé.

Sé lantoupriz-la ki ka travay épi IA générative, oblijé respekté sé lwa-a ki ka défann valè lidé sosialis la ki ala baz péyi-a.

Sé lwa-tala, anlè IA, ka permet opozé moun annou distribiyé lenfòmasion ki pé pousé popilasion-an rifizé pouvwa Léta-a.

Lachin ka mété doubout nouvo lwa an péyi-a, ki ké la pou véyé anlè manniè IA générative ka dévlopé. Léta ka angajé koy pou enden anlè zafè dévlopé tousa ki nouvo pabò IA générative la.

Sé met afè Lachin la, adan ladministrasion cyberespace sòti an séri lwa ki la pou ba sé lantoupriz IA lotorizasion fè konmes épi travay-yo, anlè IA. Travay-tala, ka trapé lotorizasion, selman pou sé profésionnel-la.

Sé désizion-tala ka alé an sans projé Pékin, ki limenm, lé ni an kontrol anlè dévlopman IA générative, kontel ChatGPT.

Jòdijou, Lachin tiré sé pinision-an i té ka ba a, kontel lanmann ki té ka alé dépi 10 000 jik 100 000 yuan. Adan sé nouvo lwa-a Lachin ka permet travay anlè tout kalté sijé IA générative pé sòti.

Présidan Macron adan yonn di sé konférans li a té ka di i té ké simié an lentèlijans artifisiel pou limanité. Men, nou, nou té ké enmen mandé'y, ba kiles limanité ? Es sé an limanité ki té ké sèvi, fasilman, tout moun anlè boul latè-a ? Tout sé péyi-a té ké ka travay ansanm-ansanm, an travay kolé tet, kolé zépol, an travay pou an bénéfis ki té ké alé ba tout moun.

Tout sé péyi-a té ké fè wouchach épi lasians. Yo té ké ka fè kous pou touvé solision nef, toupannan yo ka bokanté lekspérians, lakonnésans ant yo.

Limanité-tala té ké kon an lidé ki lé ranjé lentèlijans artifisiel la, ba'y an bel ganm, mété'y an manniè pou sèvi tousa ki bien, tousa ki bon pou sa sèvi tout sé bon valè-a, pou sa sèvi, lenpòtans lentéré an moun, pé ni, pou an lidé. Pou sové lavi moun, é miyoré lasatisfaksion moun andwa ni pou kòyo.

Limanité-tala té ké pou miyoré lalironday-nou. Sa té ké pou fè nou viré vini anlè sé kèsion-an ki ka palé di lékolomi. Nou té ké pou travay ba an limanité ki ka fè nou di bien. An limanité otila nou ka santi kònou bien.

Ki koté nou lé rivé épi tousa ?

Jòdijou, pi gran danjé ki pé ni adan zafè-tala, sé ki manniè moun, yo menm, yo ké sèvi sé zouti-tala ?

Ki manniè, épi lentèlijans artifisiel, la yo ké vini sèvi, endé, potéjé moun ki anlè latè-a ?

Es danjé-a ké vini silon model lapolitik yo ké chwézi ba péyi-yo ?

Es danjé-a, sé gadé wé, ki lidé yo ni anlè sa, é jis ki koté-a yo lé rivé ? Oben, es yo asiré sav, kisa yo lé rivé fè a ?

Danjé-a, jòdijou, sé es nou sa pòté poteksion ba pwop jan péyi- a ? Es sé selman lapolitik épi lékolomi ki pé mennen poteksion-tala ?

I fok sé péyi-a ni an larel é sav ki manniè yo ka mennen larel-tala. I fok yo sav sé ki model lapolitik yo chwézi. I fok yo ka kontrolé, é kontrol-la ka fet, silon politik yo ka touvé ki bon ba péyi-a. Fok Léta mété zouti pou vini gadé sa ki ka fet. I fok i ni bon wotè asou lakonnésans, épi lateknik. Pou sa, i fok i kapab, konprann, konnet, véyé, anlè sa ki ka fet.

Fok ni an lapolis ki la ek ki kapab alé wè sa ki ka pasé adan sé algorithme-la, sé latilié reg ek lenfòmasion moun ka sèvi épi lòdinatè.

Fok ni an lotorité ki kapab fè péyé gwo lanmann pou sa ki pa ka suiv. Lotorité-tala ni pou véyé anlè lantoupriz ki ka sòti létranjé pou vini travay an péyi Léwop oben Lafrans. Sé kon tout, lè ou lé potéjé kow kont minas ki ka ni, i fok ou ni lakonnésans ek lekspérians ki solid.

Nou ka bien wè, lanmérik, yonn anpami pwoblenm yo té ni, sé zouti yo té ni, lafos pouvwa yo té ni. Lakonnésans sé gran lantoupriz privé a té ni, té anchay pli douvan ta Léta fédéral té ni. Adan sitiyasion-tala, Léta fédéral té ka touvé koy pli feb, ni mwens fos ki sé lantoupriz privé a.

OBAMA té ja bien pran douvan lè i mété an létjip la pou véyé pou wè si tout sé lenvansion-tala té ka fet kant é kant épi la lwa.

Fok sé péyi-a ki ka sèvi lentèlijans artifisiel la, ka chwézi an aksion politik, é ni an pouvwa politik ki ka alé an menm balan ki dévlopman lentèlijans artifisiel la. I fok péyi-a met tout sé pouvwa-a ki ta'y la, ki ta Léta, ki anba lopsion Léta, ki anba lotorité Léta.

Sa ki fet ki, nou oblijé admet adan lentélijans artifisiel la i ni bon lapolitik adan'y, lapolitik-la an plen andidan'y menm, pou mété'y an mannev adan an péyi.

Dènié mo nou anlè sa, sé lasians ka vansé vansé'y. Moun anlè latè ka envanté, moun andwa envanté. Labib-la ka di, pou sa ki ka kwè an sa, "Mi miy ! Mwen la ka fè tout bagay-la, tounef". (Isaïe 43, 19).

Moun ka di jòdi, lasians ka alé two lwen. Nou menm ka di, okontrè, sé pa lasians ki ka alé two lwen, sé nou menm ki ni pou véyé kònou pou nou pa viré tout lenvansion-nou kont kò-nou, kont nou menm.